 |
 |
 |
|
小黑日記
|
|
| 最近一次更新日期︰ 15/05/2000 |
第一輯．第二輯．第三輯．第四輯．第五輯．第六輯．第七輯．第八輯．第九輯．第十輯．第十一輯
15/05/2000
「我流汗故我在」
睇番個日記。嘩成個月無寫過o野。原來我的生活片段都漏空o左整整一個月咯！最衰生活唔係空白o左一個月啦...時間仍然係咁行，都唔等人o既。上星期五晚，見到劉教練響網上，無無聊聊問佢出唔出來踩一轉 skatebic，於是夜晚十二點幾出發，返公司拿車，原本打算由牛頭角踩去九龍城o既，點知踩到鑽石山都已經係成兩點半啦！於是又去食宵夜返屋企啦！ 講真真係幾好o架！流下汗代表自己真正活過嘛！我自己呢就唔想成世人十下十下啦！呢個世界，成五十億人，個個都係響個世界度遊下遊下。然後幾十年突然之間，發現自己行又行得唔夠人快，個藥煲就成日揹住， 知道自己原本又就來到尾站。再想一想，點解自己幾廿年來都係同其他人一樣遊下遊下呢？到時就開始後悔，可惜最後都係要落車，然後發現呢個世界繼續轉轉轉……其他人又繼續遊下遊下……嘩！真係幾恐怖的。 所以「我流汗故我在」呢樣哲學係一項非常艱深但又容易理解的道理。
可愛的讀者仲唔明？睇o下呢個小黑日記啦！上個月寫o左一篇，到今篇足足一個月。大家呢個月又做o左o的咩呢？有o的咩做o左你係記得的？可能有o的人有，但我肯定更多人都唔知上個月成三十日點樣響隻得12個數目字的 手錶度轉下轉下無o左。恐怖哩！唔算呀！你以前o的日子都係響相同一個時間盤上轉走咋！
所以充滿人生哲理的小黑．網又比大家一個儆醒！唔好深深比小黑的風采迷倒住，從來真理都唔係無無聊聊搵到的。係要經歷無數痛苦先至發現o架！不過條路有人行過，就唔好再行啦知道未？
16/04/2000
小黑創舉
星期日返一返公司，睇完一o的遲o的有用的資料。回家打算踩 skatebic。於是就起程。九時二十二分由牛頭角起程，十時零五分回到家。我又一次証明李麗珊拿奧運金牌時講的一句︰ 「香港o既運動員唔係垃圾！」仲唔係飛越黃河之後的另一件盛事？我選擇o左沿高速公路行。當然係行行人路啦！o的大巴士咁快！比佢一吸就入o左車底啦！沿途經過啟業，彩虹，行荷里活後面有條路回家。o的路係一塊一塊的磚砌成的。所以好唔順。 成日要踩。返得到屋企好有滿足感。記得以前中七，搭尾班地鐵訓著去到藍田。一個人行路返屋企，由夜晚一點行到三點。真係幾傻！今日，無聊我又做o左傻仔啦！
05/04/2000
手作仔 — 爸媽，我怕
爸爸，媽媽，我怕。 我怕獨個坐在家中，對著那發著閃光的電視。 洋娃娃們，平日樣子好可愛。 當你們不在家，她們向我猙獰。 爸爸，媽媽，我怕。 我怕獨個坐在家中，對著四幅空洞的牆。 桌上的照片，是我們生活的剪影。 當你們不在家，它們變成了我的獨照。 爸爸，媽媽，我真的怕。 你說要生活幸福，每天要努力工作。 卻只看見你回家疲倦的臉容。 你說要為將來，每天要努力工作。 卻使我活在孤寂的現在。 爸爸，媽媽，我真的怕。 我只要徜徉在你的身上， 我不看電視，不要洋娃娃。 我不要獨個等待幸福的將來。 我只要聽你微聲的呼吸， 我只要你捉緊我的手。 我只要你們同在， 我真的怕，但只有你們在， 我就不怕。
04/04/2000
童年陰影
今日係清明節，訓到成十一點。跟住起身睇 vcd。一個人響屋企令我回想以前中六的日子。以前放學，即刻同 david 由西營盤行落上環搭地鐵回家。三點半放學四點三就到。唔可以話係嚮往但當時的日子好深刻。同中學的同學分開晒， 各自有朋友。但我就好似無。所以算係一段好黑暗的子。睇見以前間中學係唔知咩十大實力中學。吹漲！我一o的都唔留戀。更唔會話因此自豪。我係唯一一個敬畏o既就係以前 個校長劉文安。好好人，成日巡走廊，同學生傾偈。佢記得我個名，叫我去校長室，比張飛請我睇管弦樂演奏會。之後 o個個，我係響早會台上見過佢之外，我以為佢唔駛番工。完全無好感。
我仲有一個童年陰影。我好驚去食得好豪o個隻。我明白咩叫辛苦搵來志在食。但我細個小學時，日日下晝食粥。食豆鼓白 飯魚，食雪菜肉絲，得我同妹妹同呀麻三個人，雖清淡但好滿足。自此我覺得食得太好係一種罪。食到飽到頂住更係罪中罪。 我係唔係有問題呢？
27/03/2000
幾隻cd
將新書檯搬進細妹以前的房。右手邊有一個小櫃。同以存放我的cd。書檯上架一個從宜家買的木架。放些掃瞄器和打印機等。 加上一支書桌燈，那就是我的小天地。我喜歡在無聊時，拿起支結他彈一會。從窗外看出去，有點點山景。路燈跟車的頭燈 一點一點的，十分安寧。寫寫信，看看書，時間不知不覺就過去。有幾隻cd是我最愛的。一隻是玉置浩二的酒紅色的心。夜晚聽真的十分舒暢。一隻是phantom of the opera。我記得，我用 了七百五十蚊一張票的價錢，買了兩張票來跟我最愛的人去看這音樂劇。當時還是讀書。這兩張票等於我當時的一切財產。 但能跟愛人一起看這音樂劇，十分有記念性。另一隻，哈哈！是呂珊的「三千六百五十夜」精選。以前預科時一個女孩子， 雞仔聲唱出這歌。十分深刻，也是不值這位有實力的女歌手始終紅不起來，而特地買回來的。聽著這歌，覺得時間飛快，讀書 時代過去，人生又另一階段。何時，我又回想我又已經垂垂老矣呢？
20/03/2000
生命比電腦還麻煩
今天原定早上六時半把公司原有的郵件伺服器遷移昇級到新電腦。起床已是不易，搭的士返去又發現太早司機沒有零錢找贖。 辛好那些散銀和那張最後有20蚊紙揍夠數。昇級過程不難，將台舊機的資料用網絡抄到另一台新機上，再把系統 資料及保密設定，ip address 抄過去，加上測試就完成。但我們都攪成差不多到九點，比起原定八點鐘差了一小時。 雖然比預計時間長了，我和彼得都覺得這是一個成功的遷移。現時的處理器是兩顆 500mhz 的，比起以前的 200 mhz 快。 記憶體又比以前加多一倍，外頻又比以前快33%。所以應該可以有一段時間安枕無憂。生命如果可以像電腦般昇級，難以處理的事情，解不開的死結，糾纏不清的人際關係，情意結等等，搬到一個新的靈魂軀殼裡。 以前做不來的，新的「自己」可以輕鬆攪點。這又真是一個好的方案呀！可惜「可幸？」生存只有一次，命仔只有一條，好像畫布 只有一張，畫的東西又有很多。只有肯定自己走的路，選擇的生活是最合適自己。那樣，就不會有後悔。只是，看著那個運作良好的 新電腦，兩眼呆滯，先至會醒覺到 — 「生命比電腦還麻煩」！
12/03/2000
裂縫中的一點生機
我個子細小，身邊的人總是把我擠出去。我越是向著我的目標前進，發現他們越兇！她那強大的軀幹，跟他那有力的手臂，常常把我壓著，使我透不過氣！ 可是我有一種說不出的生命力，人越要把我往後推，我越要往前衝！我一直的往前進，給我越來越接近，我把身體逼到了那個裂縫：只要我過得了那個裂縫， 我就會有一個新的開始！可是她們總是喜歡留難別人，得不到偏又要令你不得好過。好！我一定要一鼓作氣！殺呀………卒之，我終能穿過那眾多的人群，讓我的手穿過那鐵閘，在那數字鍵盤上輸入那股票號碼，看到今天的股票走勢。
26/02/2000
我會知道幾時要退
我母親每天晚上回家，總要開著爐火，米粉也好，炒清菜也好，總是要煮一點東西給我吃才安樂。我有時 覺得她們回家，已經是很夜，我特地是吃完才回家。為的是叫她不要再費心煮飯，多點休息。但她總是不聽。之前致電說我正在街上吃飯，不要煮東西。就是回家也有一碗湯端到你面前。 剛說很飽不吃任何東西，轉個臉一個切好一片片的生果就放在你電腦桌上。你說如何減肥？！一些朋友詢問新的型號電話如何美麗又昂貴，我訴說同等價錢可買三部功能相若的電話，或是可購買便宜一點同樣大小的其他型號。就是在他點頭稱是之時，轉身已告訴你在那裡訂購了。
感情每去到一個死結而第三者介入，想著舊情是挽救還是放棄的時候，朋友苦苦規勸新的感情是如何虛幻一片，互不相配。最後往往做了一個很不智的決定，大家都受到傷害。
有時侯一些事情的對錯結果，自己是明白知道的。小時候明白甚麼該做，甚麼不該做。又真的切實遵行，那麼我們其實是走著一條很安全的路。人大了就不同，雖然事情也知道對與錯，是與非。 卻是假裝聽不見，看不到朋友的規勸。這其實這是某程度的一種固執。是幻想著是美麗的，淒迷的行為。大抵人總有一種一廂情願的想法，越行不通的路我越有機會走過。越是說著知道幾時要退， 越是不能自拔。以前在不開心時會喝酒，以為自己在迷幻中，活得很快樂。最後酒醒時，原來世界沒有因此而轉慢，每天人一樣是這樣生活，所以決定，只有快樂時，才會喝酒。不快樂，留給時間 去沖走吧！
25/02/2000
tonny 的 bb
星期日跟 baron 去看 tonny 的 bb，他只有七天大，進到門看見 tonny手抱住 bb，一副慈祥的樣子。而 vivian 就忙著走來走去，為家中其他事情忙碌。 只見他們一家有子萬事足，真是幸福呢！ bb 單眼皮，小鼻子，生得跟 tonny 沒有兩樣。也許吃奶花了很大的力氣，很快地就睡著了。在看看 tonny 的 電腦出甚麼問題時，bb 又表演開大給我們看。只見全家上下忙碌著為小 bb奔波， tonny 問我會不會還想要生 bb。其實，這是一種福氣呀！雖然他說一個星期 兩口子不能好好安睡，但想著這個可愛的小寶貝，咩都值得啦！同事花花帶了架 skate-bic 回來，好玩！非常好玩！可是我落街踩，用不太順的左腳，只數步就倒地。嘩！痛到我呀！條褲因地面濕了，而左手手肘更脫了 一塊皮，造成一個大約五毫般的傷口。令我第二天都收歛了。但我們在停車場落斜，真是好好玩。
個 keyboard 死o左 lu....不過個芒就好正！好光，好靚！呢個芒值得買！另外，昨晚訓梳化，想看四時開波的英格蘭對阿根庭。卒之只係看了了最後的 十五分鐘。但我就遲o左少少返工啦！damon send了一封信給我，那是關於一個小朋友仔患了絕症，希望找幫忙。我外放了消息上新聞組，亦有人接觸 damon 了。如果要其他幫助，如網頁制作等，我都可以幫忙的。又聽到一位跟我同年的女孩子患了絕症。發現生命的脆弱，真是人所不能控制。希望大家 珍惜生命。每天營營役役的生活，不如趁自己還好的時候，想想人生的意義。這幾件事，就是近來我身邊的兩三事。
30/01/2000
很冷
天氣忽然轉冷，早上起床很不習慣。b 仔晚上跟我睡，早上又唔比我起床，一郁佢就叫，好似叫我唔好將將被反來反去，吹o的冷風入去咁，幾有人性o架！
昨天晚上，黑媽煲o左o的鹿茸湯，補一補身，我一個唔小心倒o左落去個 keyboard 度。成晚個 mon 都無熄到，頭先仲開唔到機， keyboard error！嬲嬲地我 拆佢落來拿去沖水，用刷刷下佢。而家個 keyboard 放響騎樓吹風！用緊呢個就係一個小 keyboard，好難打字，好辛苦！
tonny bb 大約年初就會生啦！我相信佢都好緊張！我都替佢緊張埋。今年一開波就有咁多人有喜事，我覺得今年會比以往幾年好少少環境。希望呢個係真啦！
就來有三千個 hit，點算好呢？送部 lomo 機仔比大家玩o下啦！
21/01/2000
王傑 - giving
好少會買中文 cd，除o左呢兩個人︰王傑同黎瑞恩。王傑的幾分傷心幾分痴，係中三時的作品。剛好十年後，另一隻新大碟面世。 同一蚊o的同事打完邊爐，行o下信和，即刻買了！而家聽住來打手記，真係有一種重遇失散多年朋友的感覺。雖然比以前佢o的歌聲 係無咁滄桑，但真係好鬼man。 man 的定義唔駛係大隻，成面鬚根o個隻，睇o下佢個 look 就已經知道晒！其實我覺得佢以前首 「誰明浪子心」係最盡的。之後的例如「封鎖我一生」「假如能夠」已經過了火位。而家又可以再接近呢一位咁正的歌手。真正！去埋星際買了一個 3210 殼，打算 diy 一個顏色殼。應該幾好玩！等待！另外我又想買一個套，係好緊的，有一個轉轉o下的扣。 因為而家好興透明色。我覺得好無保護性。但係唔識同 sales 講係咩套，於是對佢講︰「好似o的緊身皮褲的那一隻。」差o的笑死 個女仔…
最後打o左一鋪網球機。五蚊局贏人地十局，幾驚比人打呀！最後打算輸比佢啦！點知條友又倣唔知做咩接唔到我o的 easy shot... 最後都贏多一局，先至咋啼輸比佢…但我同一蚊已走都走唔切…
我們去了廟街買了一支鐳射筆，九蚊雞，就結束這晚的行街街。而家聽緊王傑。晚安！
15/01/2000
自打咀巴
早兩日先講完，唔買 3210 新機轉頸就買o左，真係自打咀巴！部o野我以為價錢只係 700-800 蚊度二手。 點知個二手價企到咁硬成千一二蚊。差三四百蚊不如買一部新o既。可能係因為佢個膽係比個殼包住，少 機會壞，又可以換個新殼當新的用，所以二手價咁高。依照此說法，三千幾出o個批 8210 絕對可以玩完 幾個月放出來，個二手價可能仲高過一手價！ 8850 嘛，睇下個殼保養得好唔好啦！因為無得拆殼。劉教練， 快o的出部 8210 啦！馬程返新工，好似無人理佢，佢就自閉讀書。佢上o左 ims 極速網上行，送部 mp3 機。另外買一張 32mb 記憶咭原來要成千二蚊！照佢話，真係人出雞，佢出 800ml 美極！希望極速感覺暢快啦！我就唔同，一蚊 送了一部 cd walkman 比我，係地鐵 sell 緊個肥仔賣o個隻 model。都不知幾好呀！馬程﹐記得下次帶出來 睇下啦！
13/01/2000
萍果捉蕉
我返工果度成日都幫襯萍果捉蕉。同事靚女
joyce 上萍果捉蕉網頁度，click 幾下，第二日就送到。真係幾方便。成公司o的 file 呀， 影印紙呀，飲品呀，甚至廁紙都係！對於辦公室來講真係幾方便。最經典就係我地訂o左一支超超超超超超大型o既美極！成
700ml，真係唔知點食！ 雖然我同同事o呀 bill 神都鍾意食飯加幾滴美極吊o下味，但o甘大碌真係無咩信心響過期之前食晒……
講開，我覺得萍果捉蕉送貨係幾快，可以做到今日網上訂明天送到。但唔知佢地係唔係騎馬送貨，o的o野總係風塵僕僕！好多灰塵！上一次 joyce 訂o野就成個禮拜都無送貨，有時又無貨到時先知。個系統真係麻麻地。試過訂o左幾樣o野最後得一支利賓納係送到來！但佢地o的售後服務真係 幾好。有一次我地買一盒釘書釘，好似五蚊度，響網上睇以為o岩用，原來太大。於是即場退比佢。無咩問題，點知幾日後，有個服務員打番電話來， 問我地係唔係唔滿意佢地貨物o既品質，講晒唔好意思咁。我地就真係唔好意思啦！大家都係做服務業，佢地咁好o既服務真係比我地好大迴響。 真係要好好效法！
今日響萍果捉蕉買o左一部電話，係 nokia 3210。同價仲有 motorola v2088。但真係見識過 motorola，所以都係信 nokia 好過。價錢 千六蚊， 講明係水貨。點解都仲要買呢？同樣水貨只係千四多o的。因為我又係萍果捉蕉度買嘛！見係有萍果捉蕉保養先至買咋！唔明二手市場部o野都要成 一千至千三蚊。仲做咩要買二手呢？差三四百蚊，比舊假電你都係度啦！個價企得咁硬，好o野！
成兩點啦！都係訓覺。成日遲番工，睇o下幾時比人鏟！
（小黑後註︰美極原來係 800ml…）
11/01/2000
再見 v+ 仔
九月一個星期日，同劉教練響荷里活睇一套叫「鐵道員」的電影。咁之前就例牌打下機啦！響玩跳舞機時，我就隨手放部香蕉響放銀仔的檯面。 可惜步法不調，幾o野就輸o左，亦係咁我就將部香蕉煙沒於人海之中……天才如我都竟然將電話呢o的物品都唔見，真係有少少覺得英雄一世， 蠢鈍一時。深深不忿，即晚去出部 v+ 仔，價值 $2580。都幾抵玩。但係部o野試過 hang 機，上一次令馬程響街頭呆等我同蟹榮幾個字。昨 晚又來一次﹐令到女朋友一蚊佢等我個幾鐘！激死！於是把心一橫賣鬼o左佢！用o左差不多三個月，仲值二千三蚊！於是即刻放！計落除o左 預繳千二之外，部機仲值二千三，即係大概 $90幾蚊一個月。當租機真抵！而家打算買部 nokia 3210玩住先。講真 v+ 仔係細部但弱不襟風。 對於我呢一個粗人真係唔多好。而家放o左，安樂晒！剛剛打算12點前去bid 部機返來。時間剛好係11:59 分。12:00 拍板。激氣填完資料，按確定時，即刻停標！又買唔到！$1426 咋！平過出面 百幾蚊！而家唯有搵部二手啦！返正呢個 model 都係跌價中，買新o既好傻o者！一於咁話！
本週金句︰萬惡窮為首。貧窮乃小黑萬惡之源！
08/01/2000
我們火紅的日子之一
我們火紅的日子，係放響版面的一幅相。呢幅相有典故o既...呢一日係「呀橙」（即係圖中後面好似剛剛比人打完一身o既四眼仔）去澳洲讀書之前，最後一次出來。我地去o左尖沙咀影相，響九龍公園玩。響九龍公園，我仲記得
當時有一個類似卡啦ok的時間，佢地幫我登記，推o左我上台唱o左一首 「沉默是金」。之後，我地去o左近左敦個公園，有好多雕塑o既地方。我地響度無聊，我地又玩o下大氣壓力*
等遊戲。最後間條衫o既謀利竟然同我地班中 泰臣個細佬 tonny 玩 「打拳賽」。謀利講明「唔准打頭」呢句係我清楚記得的條件。跟往我就拿相機，站一處影相。我一直用相機的
viewfinder 看著這拳賽。開始未幾畫面中有一點白色物體從 tonny 出拳之後飛出。後來中斷 賽事一看，原來係謀利一隻犬齒原隻脫落。我地即刻同佢去伊利沙伯睇o下有無得救。當日就係咁散去，而謀利犬齒亦與佢分家，件事亦都漸漸淡忘。究竟講明「唔准打頭」但點解又會有血案發生呢？我記得當時以下幾句說話︰
喂！講明「唔准打頭」架wor!
係你個頭縮低比我打到咋！
註* 大氣壓力係好似中二時發明的遊戲。過程簡單又危險。就係全部人一齊壓住對方響牆或者欄杆，一個壓一個，最下面個位受害者，就最開心。其餘就跟住有不同程度o既興奮感覺。因為我地唔留力，真係想殺死人咁。 所以下面o既受害者會感到死亡威脅，身體腎上腺素激發，腦部會有極興奮，精神的狀態。玩完一次就會好倦，但好正。我地玩上癮，無論邊一度都玩過。好似學校，公園，自修室，甚至呀橙響機場都比我地整一o野先比佢走……
20/12/99
Christmas
聖誕節原來是一個很美好的節日。記得中學時的聖誕，總係同劉教練呀、肥森呀、老坑呀，羅小傑咁，響尖沙咀蕩o下蕩o下，美其名睇燈飾，查實成班麻甩仔無所事事唔想返屋企！ 以前仲有金獅影帶，年年都有一個聖誕老人搖住鈴鈴同你講一句聖誕快樂。有時響老尖碼頭會見到班人響度唱o下聖詩，都幾有氣氛架！但其實到o左呢幾年，先至會真係 想下聖誕節係咩意義。聖誕節其實係慶祝耶穌基督降生，呢個時刻對基督教來講係好有意思的。昨天聽到到教會班小朋友唱歌。係叫做「誰是主角」。內容係講聖誕節慶祝的唔係 聖誕老人而係耶穌基督。「他身穿紅衣，還是身穿粗衣白布，他生於馬糟裡，還是坐雪車到步？」由班天真的小朋友唱出真係好感人。而家，我都係零願食餐晚飯，快o的返屋企訓覺！ 聖誕夜係平安夜，因為我返屋企，響張床渡過！上星期二睇o左張藝謀的「一個都不能少」。好寫實，而我亦相信呢o的真係大陸的現況。當中有兩幕好感人，一係大家努力搬塼頭賺錢，多了6元，就買兩罐可口可樂飲。唔好以為 3蚊一罐好抵，一位老師一個月都係得50蚊人工。佢地全部都未飲過，就一人一口，大家都好開心。看在眼裡，我地唔知點先至令自己滿足，但睇幾個小朋友，就發現可能我地係太過 吹毛求疵，而佢地亦好美麗。另一個係粉筆事件。故事唔講但我會知道響大陸一位老師真係唔係搵餐食o既好工，真係有理想先至會做得到。所以我同事 peter 老豆佢響大陸教書， 真令我肅然起敬！真係值得睇，快o的去睇啦！
15/11/99
ERIC CLAPTON
今日行過間音樂鋪，聽見 "still got the blues". 以前我都有呢隻碟，係 gary moore o既，尤其係呢首歌，成隻碟都好聽。 係個朋友介紹我聽。gary moore 彈結他彈到好似 saxophone 咁。真係好鬼憂怨。我喜歡聽 blues guitar，就係貪呢仲 feel。 有閒錢真係要買隻來聽聽！封面白色有支木結他，係水彩畫來的。不過今日聽果首好似唔係 gary moore o既版本，聽落好似係 eric clapton 版。點解又會聽得出？ec 彈結他唔同其他人的。又係勁推線，扯到o的結他聲好似喊咁，間唔中又扯一o野， 間唔中又扯一o野，真係好扣人心絃架！尤其係人越老越有感情真係唔講得笑。聽到都真係有少少想喊的衝動。今晚都係聽番一次，陶冶洗滌一下心情先。
30/10/99
力不從心？
響呢個年紀，身心比起以前中學時代好唔同。以前可以去玩，同肥森，老鬼坐響沙灘通頂唔番屋企，早上飲完早茶仲有氣力同肥森響修頓打波打到十二點中午先返屋企。 中三去 camp，兩條啤酒十幾人分，我仲記得我飲o左六罐，仲要傾到四五點。而家，身體成日都好倦，一早返工同自己講，放工即返屋企訓，卒之放工又唔想返屋企， 返到屋企又唔想訓，個心仲好精神。同朋友去飲o野睇波，兩支細的都差o的倒地不起。睇來身體真係有少少追唔上心靈的情況。睇見呀老細 stephen ，日日做 gym， 身體都不知幾 fit。即刻諗番以前打波，由放學打到五點三關門。真係要想想有一個好的計劃去強身健體。廿零歲就係咁，仲有幾十年人做…星期日同陳小杏傾o左好耐電話，互談近況。發覺大家都唔同晒。同學仔，成日攪攪震，而家都真正為將來打算一下。馬程，蟹榮，劉教練，莊毅，仲有…一個個都開始 迫自己上緊社會的金字塔。同以前，我地了無牽掛的日子，真係想 turn back the clock. 或許，再讓下一代去經歷吧！
24/10/99
問候
黎瑞恩是我中七至大學時代很沉戀的歌手。應該係九二年，學校的歌唱比賽，隔離班有二個女仔，佢地不約而同一齊唱「發誓」。當時我剩係識得唱，而唔知呢個女仔叫黎瑞恩。隔離班一個叫「洗米」的女同學當時
勁說我鐘意佢，又比o的 cd 我聽，又比佢o的畫集我睇，一次學校個行山學會去行西貢，無厘頭又去o左，完o左仲同洗米去牛池灣睇o的咩o野市政局文藝之夜。佢話有飛，搵埋我去睇。睇o左成個鐘o的人跳中國舞，
朗誦…原來最後15分鐘有黎瑞恩唱歌！之後完o左，洸米叫我一齊去門口等黎瑞恩，率之等到，佢好關心咁問︰「做咩唔走呀，好夜喇，返屋企啦！」。自此發現原來黎瑞恩咁好人！我都開始鐘意o左佢。
入大學後，勁買佢o的cd。當時我屋企仲未有 cd機。我將o的cd借晒比梁之豪，等我一日買o左cd機，就會問佢拿番。當時好慘，仲興一樣勁食錢的活動—抽 yes 咭！我係最浪費o個隻，因為我抽咭只係為o左要黎瑞恩的 yes 咭。一集42張，通常係得一兩張。我就勁儲一款儲好多好多張。總之破晒產……
一件耿耿於懷關於黎瑞恩o既事，就係一首叫「問候」o既歌。「問候」係黎瑞恩第一首出碟o既歌。當時佢仲係新仔，同成班新人出一隻集錦碟。之後佢比寶麗金買o左，出o左一隻「發誓」。跟住佢就紅o左。 擁有呢首「問候」o既 cd 成為我一直尋找的夢。有一次，響幾年前，響大角咀一間就執笠o既 cd鋪，見到呢隻叫做「戀曲一九九x」o既 cd。標尾會賣百五蚊。我諗o左一日，第二日去買，已經比人買o左！ 好hurt 呀。我仍然找尋呢一隻碟。希望有一天比我擁有到啦！
而家我都仲喜歡黎瑞恩o既，只係心態唔同o左。佢把聲，佢個笑容，佢雙大眼睛，會永遠都響我腦海中。至於洗米，佢而家係黎瑞恩歌迷會會長呀！
05/10/99
跳舞跳到人都癲
今晚同大學同學
justin 仔同埋 sam 仲有馬小程去玩跳舞機同結他二代。先講跳舞機先。justin 仔佢好呀！卒之搵到喜歡的工作， 咁大個理由一定要同佢去打機啦。佢係我認識之中音樂機最強之人。同佢跳舞我響屋企練完都唔夠佢跳。有一首歌，連續六十幾個
連續步法，我以前未跳過，仲要係第一首，成十蚊輸o左好唔抵！跟本就係要靠平時o的舞功根底，用潛意識去跳。但因為太著重響 視o野同腳步，我好似電腦咁，要關去某一o的資源，好似味覺同感覺呀咁，全力去用腳輸入正確o既指令。畫面的箭咀經過眼睛，
直接由背部神經對下肢作出條件反射！竟然比我成功過版！我都有o的驚訝。
之後我地一齊玩結他 link 打鼓。o的歌勁好聽，但一次每人八蚊，一鋪廿幾蚊，好快手上的錢都倒入部機裡面。但夾 band 真係幾好 feel，我諗我地可以夾埋一齊玩打真 band 先得！
04/10/99
情憑誰來定錯對
我越來越發覺我自己似張小嫻。個日記次次都係寫愛情。我仲以為自己響蘋果副刊台度寫緊專欄！唉！感情，最是叫人執迷。 有時候我真不明白，為何要這麼著緊呢？到了這個世紀，沒有拖拍像是很羞愧似的。 為了身旁要有一位伴侶而盲目追逐愛情，為了要讓友儕之間有多一個題目而盲目追逐愛情，這都是最不智的。 朋友間沒有權利去判決你愛情的對錯，但有義務為朋友的景況而憂心及提醒。愛情就像砌 puzza hut 的沙律一樣，別人幫不了忙，越幫總是越亂，自己要盡力做到最好，做一個自己也會難忘的沙律塔。因為 兜只有一個，配搭卻有很多。一不小心根基搞不好，以後再砌也得要在此之上了。總不能全倒回盆中重新再來吧！十多年前，我第一 次到 pizza hut 吃東西，那是跟中學同學一起去的。tonny 砌的沙律塔又高又堅固，自此都沒有見過更高的了。 tonny 仔現在 娶得好老婆，真係不無道理。
16/09/99
張柏芝與我
上星期一個晚上作了一個很奇怪的夢。我夢見我是一個穿著西裝的貼身保鑣。我的保護對象是靚女張柏芝。她因為有人對她下了姦殺令而十分害怕。我要廿四小時保護她免受傷害。 我雖然每一天都在她身邊保護她，她卻常常哭，我看見她十分可憐，由憐生愛。可是因為工作關係我不能對她發生感情。有時她伏到我胸膛上哭，有時她坐在我前面哭，我覺得無奈。 我很想以我的關心來換取她的安全感，但另一方面我覺得我又不可以這樣作。整個夢就是這樣，但我的心情卻是十分的難受，很「頂癮」。甚至到我醒來都仍記得這感覺。我曾對一些朋友告訴我這個夢，他們全都笑我是一個愛明星的白日夢狂。喜歡張柏芝到迷戀至夢中都見到她。講真張柏芝真係幾靚，在我夢中出現可能只是新聞影響而已。但真正想 跟他們分享的反而是那種感覺。就是那種很「頂癮」的感覺。從我的角度出發，想要去愛，卻不能愛，在張柏芝的角度，得到了愛，但不是完全的愛。因為環境，身份，背景， 道德，宗教等人類的無形枷鎖而成了畢生的遺憾，沒有勇氣去衝破它而成為生命的一個悲劇。這才是我所共鳴的。張學友有一首歌叫「生命的插曲」，是我十分喜歡的。故事就是這樣的 一個悲劇。人少時喜歡憧憬美麗的愛情，人長大了就知道自己錯失了很多，憧憬拿來換現實。那才是人不斷重覆最最的愛情悲劇。問世間，有多少對真是天作之合呢？
12/09/99
一首歌一個故事
damon 生日o果日，一齊去o左卡啦 ok。佢唱o左一首譚詠麟的「一首歌一個故事」。 早幾日見到呀 mark，一個個樣似麥迪文的英國人。佢同呀 greg 好 friend。佢響度聽緊 george michael o既 "faith"。 佢原來響二手店買o左呢隻碟。佢話呢首歌係佢以前讀大學時，響宿舍廚房度同女朋友一齊整o野食時成日聽。而家佢無人無物， 呢首歌的確係幾感慨。有時人大o左，環境變o左。但一o的感覺好耐都會仍停留響響當時的感覺中。一有o野激起，就會好 茫然。因為時間係咁去，返唔番以前的日子。但係當時的感覺永遠不變。換來的只有o果一種感覺，係好無奈。讀中學時， 有一首歌都令我好懷念。就係劉美君的「愛是無涯」。唔係因為呢首歌同劉教練有關，而係當中的歌詞。當時的我好渴望有一 段好似歌詞中咁的愛情。而家知呢o的都係少年時才會有的幻想。但聽到呢一首歌就自不然會想起。最近中國同台灣成日有問題。我都有我的睇法。我個人唔贊成中國人對中國人開戰。那怕只是攻擊外島，總之都係唔好。雖然 台灣的科技工業好發達。但我覺得台灣整體上係比中國大陸落後。台灣的領導大既係太耐無返去大陸。而家上海都比得上好幾個 台北市。如果大陸可以比佢地返o下大陸，佢地斷唔會講得出要獨立呢樣o野。大家中國人，未能統一我都覺得係一件憾事。 千祈唔好打仗…
24/08/99
做契爺
莊毅佢會做人爸爸就係上次打波時好多人都知。佢響早個月響電話突然問我︰「想唔想做人契爺？」這真係令我呆了一呆。響電話之中思想一下，都未能明白所問意思。一來我自己自問係一個唔係太成熟的人。 養起家人都尚未稱職，何況做人契爺？另外，呢個「契仔」何來？細心一想，莫非…我即時問莊毅係唔係做o左爸爸呢？佢就話，老人家說太早話比人知小孩子會小氣（！）所以叫我守住秘先，另外叫我諗o下呢件事。 我當然係替他開心啦！他是我由中一就認識的好朋友，大家識於微時，曾經分享多少人生階段。而家佢身份又高一層，彼此友誼又推進一個更深層次。於是我想了又想，決定做呢一個契爺，雖然我仲未曾結婚更不消說有 自己的孩子，但 tonny 的兒子，我定會待如己出。這是身為兄弟必然的義務。希望呀嫂你好好保重身體，食唔夠記得叫莊毅比多o的o野你食，等我個契仔第一出世時又大隻又靚仔/女。不過，雖然老友都係咁話， 個樣似你好過似佢！16/08/99
打波後
cahterine 問我點解講o左打完波點解無更新…有時候都要休息一下嘛！不過大家好耐都見小黑網二號無更新，一定覺得小黑好懶啦！呢個星期成日去玩一隻機，係叫做 percussion freaks，即係打鼓機。初時係馬程教我玩的。三隻鼓兩隻鈸一隻腳鼓，的確如果 玩得好係有o的滿足感o既！而我都已經過晒普通的歌，我覺得實在太易啦！玩o左十次度就攪掂！我今日就專登玩真實模式。又係難 o左好多！但我今日勉強都玩過到。不過就差o的死果隻。但又比我過了一個程度，自不然又有一重滿足感！有好多人都會滿足響 普通模式。我覺得，要超越人群，就先要磨練自己有一種想超越自己的心態。響學校，響社會，剩係同人鬥，當自己滿足自己的狀況 時，就會係自己停步的時候。但只有同自己鬥，先至唔會停，將自己推到高峰。大家共勉！
呢一輪至 hit係咩o野？係睇雍正皇朝呀！我正睇緊呢個電視劇的小說版。當我第一日拿起時，竟不自覺沉迷落去﹐一睇睇至凌晨三時而 不自知！所以我都向大家推介，一套三冊係買180蚊，足夠你磨上一個星期。真係好睇！另外我又睇緊一套漫畫叫做頭文字d。雖然o的人物 就畫得麻麻地，但鬥車時的畫面卻令人感到其速度感！它畫風位比起香港的漫畫更勁，使人覺得真的是現場看鬥車。而且所畫車輛又真有 其車，資料充足所以好好睇。馬程及劉教練都儲緊o架！
另外，又有一本叫做拾香紀。次文化堂出的。係講從一個家庭的經歷背景道出香港的近代史的。作者有野心，但睇o左十幾頁覺得麻麻地… 等我睇晒再話比大家知好唔好睇啦！
講o左好耐，仲未講八月十四日打波的事…今次我有帶相機呀！等我晒o左再放上來比大家睇啦！另外，失傳十年的照片重現江湖。欲知如何， 請收看小黑網二號！
28/07/99
真實記錄︰b 仔的故事 (1)
b仔係我屋企的一位成員。我仍然記得，當時係1993年，我著住校服，夜麻麻響修頓球場同肥森打籃球。我地打到好倦，就坐響足球同籃球場之間的欄杆上，我見到一個小朋友，佢蹲響地上，
隔離有一個紙箱，好多人圍埋去睇。我於是好奇行埋去睇一o下。原來係一箱貓仔。個小朋友大概係有一隻貓媽媽生o左一堆bb，咁佢又養唔到咁多，於是就拿去搵有緣人收養佢地啦。佢地個
個都好得意，有一隻貓 bb係全身黑色，四隻腳仔白雪雪。可惜好快有一個男人執走o左。我望見仲有三隻貓 bb。其中一隻好似老虎仔，o的毛啡金色，好鬼精神，我好鐘意。於是問o下個小朋
友我要o左佢得唔得，佢就叫我拿走。於是肥森就比o左幾十蚊比個小朋友買o的補品比貓媽咪食。我就抱o左隻貓仔走啦。
當時呢隻貓仔好細隻，大約係我手板咁大。我當時著住件冷衫，我除o左佢，圍住隻貓仔，放響個紙皮箱度，佢好快就即刻訓o左。佢好得意，好似「子貓物語」中的貓仔咁細隻。我帶佢返屋企， 比o的奶佢飲。但係佢唔飲奶的。原來佢已經戒o左。佢食飯，但係要撈o的魚肉。就係咁，小 b就開始佢新的生活啦！佢細個好貪玩，成日響我唔為意時跳埋來撲我隻腳，我一望佢佢又走去，一 回頭佢又來撲我。佢又好鐘意望街景，企響窗邊望下面o的車。有時佢唔知推一推佢，嚇到佢喵一聲打你一o下，然後走o左，好得意o架！
而家佢唔鐘意同我玩啦，可能佢係女仔，鐘意同我個妹玩o掛？但有時睇o下佢個樣，真係覺得佢係貓之中幾靚樣！如果好似漫畫咁變做真人，我諗一定係超級靚女！
21/07/99
大浪灣
星期一，即興約了一班大學同學，想去一次即將關閉的水上樂園。早上十時半，出現者只有我，隊長、呀柴同埋 rosita。有超過一半人都不能來…正當我地盤算應如何時。我 提議不如去海灘游水。因為只得幾個人去水上樂園好浪費，但去游泳池又浪費了我專程告假去玩的興致。呀柴並建議由他駕車，於是我地便出發了。我們決定去大浪灣。那裡沒有巴士到達，駕車比較方便。我們並已自製了一些食物。於是我們便去野餐游水。大浪灣呀，我來啦！到達的時候，很驚訝海灘只有我們四人！我們 鋪好蓆，吃過一頓野餐之後，就下海去了！天氣並不炎熱，海水很涼。我們步步為營。一步一「冰」心動魄。我的泳術不精，信心很少。扶著 rosita 的水泡，還跟他們有一大 段距離。還有下一點雨呀。我們游了一個小時左右便上水再吃一點東西。那時陽光多了一些。海灘亦多了一些人。看真一點，原來大浪灣十分美！水清沙幼，當水到我頸項時， 陽光還可讓我看見我的腳趾。還有很大群小魚在身旁來回游動。有時一個動作，竟令數以百計的小魚突然在身旁跳出水面！好看得很！在海中望向沙灘，疏落的人，一棵棵椰樹在我右手邊， 而青青的山景左右包圍著我，令我幻想自己置身在泰國的小島上！從沙灘看出去，藍色的天，青色的山，白色的沙跟微綠的海，配上鮮艷的泳裝及水泡，我覺得自己就在夏威夷， 享受清新的假期。
雖然今次我們去不了水上樂園，但我們卻享受了一個十分美好的海浴，我想這真是一個很充實的假期呀！
 |
|
 |